மறைந்த இயக்குநர் சித்திக் இயக்கத்தில் 2001-ம் ஆண்டு வெளியாகி மாபெரும் வெற்றி பெற்ற 'ப்ரண்ட்ஸ்' திரைப்படம், கிட்டத்தட்ட 25 ஆண்டுகளுக்குப் பிறகு அடுத்த வாரம் ரீ-ரிலீஸாகிறது. விஜய் - சூர்யா கூட்டணி, ஆக்‌ஷன், வடிவேலுவின் காமெடி, நெகிழ வைக்கும் நட்பின் உணர்வுகள் என, இப்போதும் பலருக்கு மிகவும் பிடித்த கம்ப்ளீட் கமர்சியல் திரைப்படமாக 'ப்ரண்ட்ஸ்' உள்ளது.

திரைப்படம் வெளியாகி 25 ஆண்டுகளை நிறைவு செய்யவிருக்கும் நிலையில், நவம்பர் 21-ம் தேதி புதுப் பொலிவுடன் மீண்டும் திரைக்கு வருவதையொட்டி, படத்தில் கிருஷ்ணமூர்த்தியாக நடித்த நடிகர் ரமேஷ் கண்ணாவிடம் பேசினோம். அவர் கலகலப்பாகத் தனது நினைவுகளைப் பகிர்ந்துகொண்டார்.

👨‍👩‍👧‍👦 'கிச்சனமூர்த்தி'யின் புகழ்:

"இத்தனை வருடத்துக்குப் பிறகு 'ப்ரண்ட்ஸ்' திரைப்படம் மறுபடியும் ரிலீஸ் ஆகிறது. குழந்தைகள் உட்பட பலருக்கும் அந்தப் படம் ரொம்ப பேவரிட். டி.வி-யில் இப்போது அந்தப் படத்தைப் பார்த்தாலும், பலர் ஆர்வத்துடன் பார்ப்பார்கள். 25 வருடங்களுக்குப் பிறகு ரீ-ரிலீஸ் ஆவது, டி.வி-யில் பார்த்து மகிழ்ந்த குழந்தைகளுக்குத் திரையரங்கில் பார்க்க ஒரு வாய்ப்பை ஏற்படுத்தியுள்ளது. இந்த ரிலீஸும் பெரிய ஹிட்டாகும்னு எனக்கு நம்பிக்கை இருக்கு."

"எனக்கு 'கிருஷ்ணமூர்த்தி' கதாபாத்திரம் ரொம்பவே நெருக்கமானது. அந்தப் படம் வெளியானதுக்குப் பிறகு, ஒரு நகைக்கடை விளம்பரத்தில் நான் நடித்தேன். அந்த விளம்பரத்தில் சில வடஇந்தியக் குழந்தைகளும் பெண்களும் நடித்திருந்தார்கள். அங்கிருந்த ஒரு பெண் குழந்தைகளிடம் 'அங்கிள் நேம் போலோ' என்று சொன்னார். நானும் 'குழந்தைகளுக்கு எப்படி என்னைத் தெரியும்' என்று நினைத்தேன். ஆனால், அடுத்த நொடியே தமிழ் தெரியாத குழந்தைகள்கூட **'கிச்சனமூர்த்தி'** என்று கத்திக்கொண்டு ஓடினாங்க. அந்தச் சம்பவம் எனக்கு ரொம்பவே ஸ்பெஷல். இன்னைக்கு வரைக்கும் அதைப் மறக்காமல் நினைவுல வச்சிருக்கேன். சொல்லப்போனால், இப்போ வரைக்கும் கிச்சனமூர்த்தி ரொம்ப பேமஸ் (சிரிக்கிறார்)."

விஜய் மற்றும் சித்திக் உடனான அனுபவம்:

"இயக்குநர் சித்திக்கிற்கு நான் இப்போதும் ஒரு நன்றி சொல்லிக்கிறேன். முதல் பாகத்தின் ரிலீஸுக்குப் பிறகு பார்ட் 2 எடுப்பதற்கான திட்டங்கள் வைத்திருந்தோம். நானும் இயக்குநர் சித்திக்கிடம் பேசினேன். ஆனால், பிறகு அது நடக்கவே இல்லை. நானும் விஜய்யுடன் சேர்ந்து நடித்த படம் அது ஒன்றுதான். 'ப்ரண்ட்ஸ்' படத்துக்கு முன்னாடி வரைக்கும் நான் டிராக் காமெடி பண்ணியது கிடையாது."

"ஆனால், இயக்குநர் சித்திக்கிற்கு உணர்வுபூர்வமாகவும் நடிக்கக்கூடிய ஒரு கதாபாத்திரம் தேவைப்பட்டது. மலையாளத் திரைத்துறையைச் சேர்ந்தவர்கள் 'படையப்பா' படம் பார்த்துவிட்டு இந்தக் கேரக்டருக்கு நான் பொருந்திப் போவேன்னு இயக்குநரிடம் சொல்லியிருக்காங்க. அப்படித்தான் நான் படத்துக்குள்ள வந்தேன். 'ப்ரண்ட்ஸ்' படத்தின் மலையாள வெர்ஷனில் நான் நடித்திருந்த கதாபாத்திரத்தில் ஸ்ரீனிவாசன் சார் நடித்திருந்தார்."

ப்ரண்ட்ஸ்: இயக்குநர் சித்திக், விஜய், சூர்யா

இளையராஜாவின் பாராட்டு:

"தமிழ் வெர்ஷனை இளையராஜா சார் பார்த்துவிட்டு, 'விஜய், சூர்யாவை நடிக்க வைத்தது முக்கியமான விஷயம் கிடையாது. படத்துக்கு ரமேஷ் கண்ணாதான் சரியான செலக்‌ஷன்' என்று பாராட்டினார். அவரே அப்படியான பாராட்டைத் தந்தது பெரிய ஆசீர்வாதம் எனக்கு. சொல்லப்போனால், 'ப்ரண்ட்ஸ்' படத்தில் காமெடி, ஆக்‌ஷன், டிராமா, சென்டிமென்ட் என அத்தனை விஷயங்களும் இருக்கும். இப்போதெல்லாம் அப்படியான திரைப்படங்களைப் பார்க்க முடியலைங்க! என்கிட்ட பேசுற என்னுடைய நண்பர்கள் பலரும் இதே விஷயத்தைதான் சொல்றாங்க."

இயக்குநரை இழக்கும் சோகம்:

"இன்னொரு முக்கியமான விஷயம். இந்த ரீ-ரிலீஸ் சமயத்தில் சித்திக் சார் நம்மகூட இல்லை. அவரை நான் பர்சனலா ரொம்ப மிஸ் பண்றேன். அவருடைய 'பாஸ்கர் ஒரு ராஸ்கல்' படத்துக்கு நான் டைலாக்ஸ்கூட எழுதியிருந்தேன். அவருக்கும் என்னை ரொம்ப பிடிக்கும். நாங்கள் இருவரும் மாத்தி மாத்தி கவுன்ட்டர் போட்டு ஜாலியாக பேசுவோம். எந்தக் கெட்டப் பழக்கமும் இல்லாத மனிதர் அவர். அவர் இப்போ நம்மகூட இல்லாதது காலத்தின் கொடுமை! அதே மாதிரிதான் மதன் பாபு பேசுற வசனமும் படத்துல ரொம்ப ஃபேமஸ். அவரும் இப்போ நம்மகூட இல்லைங்கிறது வருத்தமான விஷயம்."

மறக்க முடியாத காட்சி:

"சித்திக் சார் பொறுத்தவரைக்கும் அவர் பேப்பரில் எழுதுவதுதான் ஃபைனல். அதுக்கு மேல எதுவும் மாத்த முடியாது. 'ப்ரண்ட்ஸ்' படத்தில் நான் எதேச்சையாக **'ஆடு நடக்குது மாடு நடக்குது'** டைலாக் போட்டேன். அவருக்கும் பிடித்துப் போய் அதை அப்படியே வைத்துக்கொள்ள விட்டுவிட்டார். சிம்புவுக்கு நான் போட்ட டைலாக் ரொம்ப பிடிக்கும். அவர் 'ஆணியே புடுங்க வேணாம்' டைலாக் பலருக்கும் பிடிக்கும். ஆனா, எனக்கு உங்க ஆடு மாடு டைலாக்தான் ரொம்ப பிடிக்கும்னு சொல்வாரு."

"முக்கியமாக, வடிவேல் சார்தான் அந்தப் படத்துக்கு மிக முக்கியமான ப்ளஸ்னு சொல்லலாம். அவருடைய நேசமணி கேரக்டருக்கும், 'ப்ரண்ட்ஸ்' படத்தின் அத்தனை கேரக்டர்கள் பற்றியும் வரும் மீம்ஸ்களை நான் எதையும் மிஸ் பண்ணிட மாட்டேன், அத்தனையையும் நான் பார்த்துடுவேன்."

"படத்துல பலருக்கும் பல காட்சிகள் மறக்க முடியாத அளவுக்குப் பிடித்திருக்கலாம். ஆனா, எனக்கு கடிகாரம் உடையும் காட்சிதான் மறக்க முடியாததுனு சொல்வேன். ஏன்னா, அந்தக் காட்சியில கடிகாரம் கீழ விழுந்து உடைஞ்சிருச்சுனா அதை ஒட்டுறதுக்கு மறுபடியும் 1 மணி நேரம் ஆகும். அந்தக் காட்சியில விஜய்யும் சூர்யாவும் சிரிச்சுட்டே இருந்தாங்க. மறுபடியும் கடிகாரத்தை ஒட்ட வச்சு ரீ-டேக் எடுத்துட்டே இருந்தோம். இப்போ நீங்க பார்த்தாலும் அந்தக் காட்சியில விஜய்யும், சூர்யாவும் திரும்பி நின்னு சிரிச்சுட்டுதான் இருப்பாங்க" என்றபடி தனது நினைவுகளை முடித்துக் கொண்டார்.