துல்கர் சல்மான், ரானா, சமுத்திரகனி ஆகியோர் நடித்த 'காந்தா' திரைப்படம் இந்த வாரம் திரைக்கு வருகிறது. இயக்குநர் செல்வமணி செல்வராஜ் இயக்கத்தில் பீரியட் திரைப்படமாக உருவாகியிருக்கும் இப்படத்திற்குப் பெரும் எதிர்பார்ப்பு நிலவுகிறது. இத்திரைப்படத்திற்காக துல்கர் சல்மானை சினிமா விகடன் யூடியூப் தளத்திற்காக பேட்டி கண்டோம்.

துல்கர் சல்மான் பேசியதாவது:

"'மகாநடி' திரைப்படம் என்னுடைய முதல் பீரியட் திரைப்படம். அது டிஸ்னி உலகத்துக்குள்ளே போகிற மாதிரியான உணர்வை எனக்குக் கொடுத்தது. இது போன்ற பீரியட் படங்கள் செய்வது டைம் டிராவல் செய்வது போலத்தான் இருக்கும். பல மொழிகளில் நான் கதை கேட்பேன். நடிப்பதற்காகவும், தயாரிப்பிற்காகவும் நான் கதைகள் கேட்பேன். ஆனால், 'காந்தா' மாதிரியான கதையை நான் இதுவரைக்கும் கேட்டதில்லை. என்னுடைய தயாரிப்பு நிறுவனத்தின் பெயரை இந்தப் படத்தில் பார்ப்பதில் அப்படியொரு த்ரில் இருந்தது.

நிறைய நல்லப் படங்களுக்கு தயாரிப்புப் பக்கத்திலிருந்து முழுமையான ஆதரவு கிடைக்காது. அதனால், அது போன்ற நல்லப் படங்களை நான் பாதுகாக்க விரும்புவேன். என்னுடைய அப்பா அம்மா எனக்குச் செய்த விஷயங்களால்தான் என்னால் இப்படியான ரிஸ்க் விஷயங்களை கையில் எடுக்க முடிகிறது. எப்போதுமே நல்ல படங்கள் செய்வதற்கு எனக்குத் தைரியம் இருக்கிறது.

அப்பா (மம்மூட்டி) என்னிடம், 'உனக்கு அக்காவுக்கு கல்யாணம் பண்ணிக் கொடுக்கணும், வீடு கட்டணும்னு எந்தக் கஷ்டமும் கிடையாது. எனக்கு அப்படியான கமிட்மென்ட் இருந்தது. அதனால்தான் சில மோசமான படங்களில் நான் நடித்தேன். உனக்கு அதெல்லாம் கிடையாது. அதனால, நல்லப் படங்களைத்தான் நீ தேர்வு பண்ணனும்' என்று கிண்டலாகச் சொல்வார். நல்லப் படங்களைத் தேர்வு பண்ணிக்கொண்டே இருந்தால், நல்ல திரைப்படங்கள் நமக்கு வந்துகொண்டே இருக்கும்," என்று கூறினார்.