நிறைய பேர் நாகரிகத்துக்காகத் தும்மலை அடக்குகிறார்கள். தும்மலை அடக்கலாமா? நவீன மருத்துவம் என்ன சொல்கிறது? டாக்டர் கு. கணேசன் விளக்குகிறார்.

தும்மல் என்பது சுவாசப் பாதையின் இயற்கை அரண்

தும்மல் ஓர் அனிச்சைச் செயல். காற்று தவிர வேறு எந்த அந்நியப்பொருள் நுழைந்தாலும், மூக்கு அதை அனுமதிக்க மறுக்கிறது. அதற்கான அனிச்சைச் செயலே தும்மல் ஆகும்.

நாம் சுவாசிக்கும் காற்றில் கண்ணுக்குத் தெரியாத தூசு, துகள், தொற்று போன்றவை இருந்தால், அவற்றை வடிகட்டி அனுப்பும் வேலையை நம் நாசித் துவாரத்தில் உள்ள முடியிழைகள் செய்கின்றன. அளவுக்கு அதிகமாக அந்நியப் பொருள்கள் நுழைந்தால், சுவாசப்பாதையில் உள்ள சவ்வுப்படலம் தூண்டப்படுகிறது.

இதன் தூண்டுதலால், நுரையீரல், தொண்டை, வாய், வயிற்றுத் தசைகள் எல்லாமே கூட்டணி அமைத்து, சுவாசப்பாதையில் உள்ள காற்றை அழுத்தமாகவும் வேகமாகவும் மூக்கு வழியாக வெளியில் தள்ளுகின்றன. **இதுதான் தும்மல். நம் சுவாசப்பாதையின் பாதுகாப்புக்கான இயற்கை அரணே தும்மல்.**

சின்னக் குழந்தைகள் மூக்கைப் பொத்திக்கொண்டு தும்மக்கூடாது

தும்மலை அடக்குவதால் ஏற்படும் ஆபத்துகள்

ஒரு தும்மலின் வேகம் மணிக்கு **160 கி.மீ.** ஆகும். இவ்வளவு வேகத்தில் வெளிப்படும் தும்மலை அடக்க நினைத்தால், உடல் உறுப்புகள் பாதிக்கப்படுவது உறுதி.

பொதுவாக, ஒரு தும்மல் தொடங்கும்போது மூக்கில் உணரப்படும் அழுத்தத்தின் அளவு, 1 – 2 kilopascal ஆகும். தும்மல் வரும்போது மூக்கையும் வாயையும் மூடிக்கொண்டால், **இந்த அழுத்தம் 20 மடங்கு அதிகமாகிவிடுகிறது.**

உடலில் ஏற்படும் பாதிப்புகள்:

சுவாசப்பாதையில் உள்ள தொண்டை கிழிவது மட்டுமன்றி, **செவிப்பறையும் கிழிய** வாய்ப்புண்டு.
விழியில் அழுத்தம் அதிகரிக்கலாம்.
ரத்தக்குழாய்களில் காயம் ஏற்படலாம்.
கழுத்துவலி, விழுங்குவதில் சிரமம், குரலில் மாற்றம் உண்டாகலாம்.
நடுநெஞ்சில் இரண்டு நுரையீரல்களுக்கு இடையில் காற்று புகுந்துகொள்ளக்கூடும் (**Pneumomediastinum**). இது கடுமையான நெஞ்சுவலியையும் மூச்சுத் திணறலையும் ஏற்படுத்தலாம்.
மூளையில் ஏற்கெனவே தமனிப்பெருக்கம் (Aneurism) இருக்குமானால், அது வெடித்து **உயிருக்கு ஆபத்தை உண்டாக்கலாம்.**

ஆகவே, டாக்டர் கு. கணேசனின் அறிவுரை: **தும்மல் வந்தால் தும்முவதே நல்லது. அடக்க வேண்டாம்.**