தமிழ்க்கடவுள் என்று போற்றப்படும் முருகப்பெருமான் அடியார்களின் குரலுக்கு ஓடிவந்து அருள் புரிபவர். அப்படி அவர் ஓடி வந்து அருள் செய்த தலங்களில் ஒன்று **இலஞ்சி**. இது தமிழகத்தின் எல்லைப்புற ஊர்களில் ஒன்றான செங்கோட்டைக்கு அருகில், தென்காசி-செங்கோட்டை நெடுஞ்சாலையில் அமைந்துள்ளது.

💡 மூன்று முனிவர்களின் விவாதமும் முருகனின் காட்சியும்:

முன்னொரு காலத்தில் கபிலர், காசிபர், துர்வாசர் ஆகிய மூன்று முனிவர்களும் திருக்குற்றால மலையில் கூடியிருந்தனர். அன்றும் அவர்களுக்குள் மெய்ஞ்ஞான விவாதம் நிகழ்ந்தது. சிருஷ்டி தத்துவத்தின் விளக்கம் குறித்து ஆலோசனை நடத்தினார்கள்:

**கபிலர்:** "உலகம் இல் பொருளே" (இந்த உலகம் மாயை, இல்லாத ஒரு பொருள்) என்றார்.
**காசிபரும் துர்வாசரும்:** "உலகம் உள் பொருளே" (உலகம் கண்ணெதிரே இருக்கிறது, அது உள்ள பொருளே) என்று வாதிட்டனர்.

இந்த விவாதத்திற்கான விடையை ஆதி மூலமே அறிவார் என்று முடிவு செய்த துர்வாசர், முருகப்பெருமானைத் துதிக்கத் தொடங்கினார். பக்தர் குரல் கேட்டதும் ஓடிவந்த முருகன், துர்வாசர் முன்பாகத் தோன்றி, **"தாமே முத்தொழில் புரியும் மூர்த்தி, தாமே உண்மையான பரம்பொருள்"** என்பதை உணர்த்தினார். இதைக் கேட்ட மற்ற முனிவர்களும் புலவர்களும் தங்கள் ஐயம் நீங்கப் பெற்று முருகப்பெருமானைத் துதித்தனர். இப்படி முருகன் காட்சி தந்து அருள் செய்த தலமே இலஞ்சி. இங்குதான் இலஞ்சிக் குமாரர் திருக்கோயில் அமைந்துள்ளது.

வரதராஜரும் இருவாலுக ஈசனும்:

இலஞ்சியின் சிறப்பு:

தாமரைப் பூக்கள் நிறைந்திருக்கும் நீர்த் தடாகத்துக்கு **'இலஞ்சி'** என்று திருப்பெயர் உண்டு. இத்தலத்தில் அருள்பாலிக்கும் முருகனை அருணகிரிநாதப் பெருமான் திருப்புகழில், 'இலஞ்சி விசாகப்பெருமாளே' எனப் போற்றுகிறார். தன்னை நாடி வரும் பக்தர்களுக்கு வரம் வாரி வழங்குவதால், இந்த முருகனுக்கு **வரதராஜர்** என்ற திருநாமமும் உண்டு.

அகத்தியர் பிரதிஷ்டை செய்த லிங்கத்திருமேனி:

இங்கே அருள்பாலிக்கும் சிவபெருமான் அகத்தியரால் பிரதிஷ்டை செய்யப்பட்டவர். சிவ-பார்வதி திருக்கல்யாணத்தின்போது புவியின் சமநிலைக்காகச் சிவனாரின் கட்டளைப்படி தென் திசைக்கு வந்த அகத்தியர், தான் பயணிக்கும் வழியெங்கும் சிவலிங்கப் பிரதிஷ்டை செய்து வழிபட்டார். அப்படி அவர் இலஞ்சி வந்தபோது சித்ரா நதி தீரத்தில் **வெண்மணலால்** ஆன ஒரு லிங்கத்தைப் பிரதிஷ்டை செய்து பூஜித்தார். வெண்மணலுக்கு வடமொழியில் 'இருவாலுகம்' என்று பெயரிருப்பதால், இந்த லிங்கத்திருமேனிக்கு **'இருவாலுக ஈசன்'** என்ற திருப்பெயர் ஏற்பட்டது. இத்தலத்தின் அம்பிகைக்கு **இருவாலுக ஈசர்க்கினியாள்** என்று திருப்பெயர். இத்தல ஈசனையும் அம்பிகையையும் வழிபட்டால் வாழ்வில் குறைகள் அனைத்தும் விலகும் என்பது நம்பிக்கை.

சோமாஸ்கந்த மூர்த்தி தரிசனமும் கந்தசஷ்டிச் சிறப்பும்:

சித்திரை மற்றும் ஐப்பசி மாதங்களில் குற்றாலநாதர் கோயிலில் 'விஷு' திருவிழா நடைபெறும். அப்போது, வள்ளி, தெய்வானை தேவியருடன் இலஞ்சிக் குமாரரும் சென்று கலந்துகொள்வார். மேலும் பத்து தினங்கள் அத்தலத்திலேயே தங்கியிருந்து அருள்பாலிப்பார். பின்னர் திருக்குற்றால அருவியில் தீர்த்தவாரி முடித்து, இலஞ்சி திருத்தலத்துக்குத் திரும்புவார்.

பொதுவாக, சிவனும் முருகனும் அம்பிகையும் கூடியிருக்கும் திருக்கோலத்தைச் சோமாஸ்கந்த மூர்த்தி என்போம். இத்தலத்தில் ஈசன் பத்து நாட்கள் சோமாஸ்கந்தராகக் காட்சி கொடுக்கும் அழகு கண்கொள்ளாக் காட்சி. புறப்படும்போது தன் மகனான இலஞ்சிக்குமாரருக்கு ஈசன் புதுப்பட்டாடை பரிசு தந்து வழி அனுப்பி வைப்பாராம்.

கந்தசஷ்டி விழாச் சிறப்பு:

இங்கு நடைபெறும் கந்தசஷ்டி விழா மிகவும் சிறப்பானது. இத்திருநாளின் ஆறு நாட்களிலும் முருகப்பெருமான் ஆறு திருக்கோலங்களில் அருள்பாலிப்பார்:

முதல் நாள் - பிரம்மன்
இரண்டாம் நாள் - அரி (விஷ்ணு)
மூன்றாம் நாள் - ஈசன்
நான்காம் நாள் - மஹேஸ்வரர்
ஐந்தாம் நாள் - சதாசிவ மூர்த்தி
ஆறாம் நாள் - முருகப்பெருமான் (தானே சகலமும் என்பதை உணர்த்துவார்)

இத்தலத்தின் கந்தசஷ்டி விழா குறித்து திரிகூடராசப்பக் கவிராயர் தமது திருக்குற்றாலக் குறவஞ்சியில் பாடியுள்ளார்.

வழிபாட்டின் பலன்கள்:

இங்கு வந்து இலஞ்சிக் குமாரரை வழிபட்டால் குறையாத செல்வமும் நிறைவான ஞானமும் உண்டாகும். நோய் நீங்கும். துன்பங்கள் எதுவும் அண்டாது என்று பக்தர்கள் இத்தலத்தில் கிடைக்கும் நன்மைகளைப் பட்டியல் இடுகிறார்கள். மேலும், **திருமணத்தடை உள்ளவர், புத்திரபாக்கியம் வேண்டுபவர்களும்** இங்கு வந்து வேண்டிக்கொள்ள அவர்களின் குறைகள் விலகி வேண்டுதல் கைகூடுமாம். அப்படிக் கைகூடிய பக்தர்கள் பிராா்த்தனை நிறைவேறியதும் மாதுளை முத்துக்களால் செய்யப்பட்ட வேல் மற்றும் சேவற்கொடியைக் காணிக்கை செலுத்தி, அப்பம் மற்றும் வடை நிவேதனமாகப் படைக்கின்றனர்.

குளுகுளு குற்றாலத்துக்குச் செல்லும் அன்பர்கள் தவறாமல் இலஞ்சிக்குமாரரையும் தரிசனம் செய்து வாருங்கள். அதன்பின் வாழ்க்கையில் வளங்கள் அனைத்தும் நிறைந்தே இருக்கும்.