பிரபஞ்ச வடிவான ஈசன் உருவமற்றவர். அவரை அருவுருவமாகவே ஆலயங்களில் லிங்க ரூபமாக வழிபடுகிறோம். அப்படி எழுந்தருளும் லிங்கங்களில் மிகவும் சிறப்பானது சகஸ்ர லிங்கம். பல ஆலயங்களில் இதை தரிசிக்க முடியும் என்றாலும், முதன் முதலில் சகஸ்ர லிங்கம் உருவான தலம் திருச்சியிலிருந்து 15 கி.மீ தொலைவில் உள்ள **திருவாசி திருக்கோயில்** ஆகும்.

இங்குதான் ஈசன், மாற்றுரைவரதர் என்று போற்றப்படுகிறார். இவருக்குப் பிரம்மபுரீஸ்வரர், சமீவனேஸ்வரர் என்கிற திருநாமங்களும் உண்டு. இத்தலத்துக்குத் திருப்பாச்சிலாச்சிராமம் என்ற திருநாமமும் உண்டு. இது தேவாரத் தலங்களுள் 62-வது தலமாகும்.

திருவாசி மாற்றுரைவரதர் கோயில் சர்ப்ப நடராஜர்

ஆயிரம் ரிஷிகளும் முதல் சகஸ்ரலிங்கமும்

முன்னொரு காலத்தில் ஆயிரம் ரிஷிகள் ஈசனை எண்ணி இத்தலத்தில் தவமிருந்தனர். அவர்களின் கடும் தவத்துக்கு மகிழ்ந்த ஈசன் அவர்களுக்குக் காட்சி கொடுத்து வரம் கேட்டார். அதற்கு முனிவர்கள், ஈசனைக் கண்டபின் இந்த உலகில் அடையவேண்டியது ஒன்றும் இல்லை என்றும், தம்மை அவரோடு சேர்த்துக்கொள்ளுமாறு வேண்டினர்.

ஈசனும் மனம் குளிர்ந்து அவர்கள் அனைவரையும் தன்னோடு சேர்த்துக்கொண்டார். லிங்க ரூபமான ஈசனின் திருமேனியில் ஆயிரம் ரிஷிகளும் லிங்கங்களாக மாறிச் சேர்ந்தனர். **அதுவே உலகின் முதல் சகஸ்ரலிங்கம்** ஆகும்.

மேலும், இங்கு வேதங்களின் பொருளை உணர்ந்துகொள்ள அம்பிகை அன்னமாக மாறி வந்து ஈசனை வழிபட்டாள். அன்னை, அன்னப்பறவையாக இங்கு வந்து அமர்ந்த பொய்கையே ‘அன்னமாம் பொய்கை’ என்று தல வரலாறு கூறுகிறது.

மாற்றுரைவரதர் திருநாமம் பெற்ற வரலாறு

சுந்தரமூர்த்தி நாயனார் இத்தலத்துக்கு வந்தபோது, கைவசம் இருந்த பொன் தீர்ந்துபோனது. வழக்கம்போல் சுந்தரர் சிவனை நினைத்துப் பாடினார். சிவனும் ஒரு பொன் முடிப்பைக் கொடுத்தார். இம்முறை சுந்தரருக்கு ஈசன் கொடுத்த பொன் தரமானதுதானா என்கிற சந்தேகம் வந்தது.

உடனே ஈசன் ஒரு சாமானியராக வந்து அந்தத் தங்கத்தை வாங்கி உரசிக் காட்டி, **"சுத்தத் தங்கம்தான். போதுமா"** என்று கேட்டுவிட்டு உடனே மறைந்துவிட்டார். ஈசன் கொடுத்த தங்கத்தின் தரத்தை உரைத்ததனாலேயே இந்த ஈசனுக்கு **'மாற்றுரைவரதர்'** என்ற திருநாமம் உண்டானது.

நோய்களை நீக்கும் நடராஜர் மற்றும் வழிபாடு

இத்தலத்தில் அருளும் நடராஜர் மிகவும் விசேஷமானவர். இவரின் திருவடியில் முயலகனுக்குப் பதில் **சர்ப்பம்** உள்ளது. இந்தத் திருக்கோலம் மிகவும் அபூர்வமானது. நோய்களை நாகமாக்கி அதை ஈசன் மிதித்து ஆடுவதாக ஐதிகம்.

இந்தச் சர்ப்ப நடராஜருக்கு அர்ச்சனை செய்து, அந்த விபூதியை 48 நாள்கள் தொடர்ந்து பூசிவர **நரம்புப் பிரச்னைகள், வாதநோய், வலிப்புநோய், வயிற்றுவலி, சர்ப்ப தோஷம்** முதலியன விலகும் என்கிறார்கள் பக்தர்கள்.
கொல்லிமழவன் எனும் அரசனின் மகளுக்குப் பிடித்திருந்த வலிப்பு நோயை இங்குதான் திருஞானசம்பந்தப் பெருமான் நீக்கினார்.

அம்பிகை பாலாம்பிகை மற்றும் பலன்கள்

இங்கு அருளும் அம்பிகைக்குப் **பாலாம்பிகை** என்பது திருநாமம். சுவாமி கிழக்கு நோக்கியிருக்க, அம்பாள் அவருடைய வலக்கை பாகத்தில் சந்நிதி கொண்டிருக்கிறாள். இருவரும் ஒருவரையொருவர் நோக்கியதைப் போல அமைந்திருப்பது சிறப்பம்சம்.

அம்பிகை கருவறைக்கு முன்புள்ள துவாரபாலகிகளின் முன் தொட்டில் கட்டி வழிபட்டால் **பிள்ளை வரம்** கிட்டும் என்பதும் நம்பிக்கை.
கிரக மூர்த்தியர் சூரியனை நோக்கியே அமைந்துள்ளனர். **சூரிய தோஷம்** உள்ளவர்கள் இத்தல நவகிரகங்களை வழிபடுவது சிறப்பு.
சண்டிகேஸ்வரிக்கு உத்திரட்டாதி நட்சத்திர நாளில் அபிஷேகம் செய்து வழிபட **தம்பதிகள் ஒற்றுமை கூடும்** எனவும் பிரிந்த தம்பதியர் ஒன்று சேர்வார்கள் என்பதும் நம்பிக்கை.

பழைமையும் பெருமையும் வாய்ந்த இந்தத் திருக்கோயிலுக்கு வாய்ப்பிருப்பவர்கள் சென்று தரிசனம் செய்து வாருங்கள். ஈசன் அருளால் நோய் நொடி நீங்கி ஆரோக்கிய வாழ்வும் ஐஸ்வர்யமும் ஸித்திக்கும்.